متتكسفِيش من التَغيير فـ شَكلِك

متتكسفِيش من التَغيير فـ شَكلِك

أو فـ تَكوينِك

من الضَعف إلي بان مِنِك

مِن التَعب إللي طال عينك

من العرَق إللى فـ إيديكي

و راسِم نهرهُ فـ جبينِك

انا عُمري فدا سنينِك

متتكسفيش

من الأوجاع

ونرفَزتِك على جنونِك

متتكسفيش

متتكسفيش من الغيرة

وتأثيرها على عقلِك

ولا الوَرَم اللي خلاكي , متتَكيش على رِجلِك

ولا تَعَبك

ولا أكلِك

متتكسفيش دانا راجلِك

ولَو ينفَع لأشيلِك شيل

و حاسس كُل تقليبة بـ أهه و نغصة جوا الليل

فـ بَطنِك شايلة حِلم جَميل

بيكبَر

و إنتي بتحبيه

طبيعي الصَعب يستقوى , عشان السَهل نفرَح بيه

متتكسفيش و لا تداري

وَجَع انا قلبي واقِع فيه

و لامِس قُدرتهُ و معانيه

و بدعي ربنا إنِك

يهون تعبك و تقوي عليه

متتكِسفيش

ده انا سنَدِك

و حِملِك جوا حُضني إرميه

وغَطي عليه فـ يتحَوِل

و إوعاكي فـ يوم تنسي بإن نهارنا هيطَوِل

و إني إبنِك الأوِل

و إني عُمرك المسكون

و إني صوتك العالي

و إني حِلمك المَجنون

و إنه مهما مهما يكون

انا بيكي و ليكي هَعيش

متتكسفيش يا قَمر الكون

متتكسفيش

متتكسفيش